ਚੰਡੀਗੜ੍ਹ: ਬੈਲਜੀਅਮ ਅਤੇ ਨੀਦਰਲੈਂਡ ਦੀ ਮੇਜ਼ਬਾਨੀ ਵਿੱਚ ਖੇਡੇ ਜਾ ਰਹੇ FIH ਪੁਰਸ਼ ਹਾਕੀ ਵਿਸ਼ਵ ਕੱਪ 2026 ਵਿੱਚ ਅੱਜ ਭਾਰਤੀ ਪੁਰਸ਼ ਹਾਕੀ ਟੀਮ ਆਪਣੀ ਸਭ ਤੋਂ ਵੱਡੀ ਪ੍ਰੀਖਿਆ ਲਈ ਮੈਦਾਨ ਵਿੱਚ ਉਤਰੇਗੀ। ਪੂਲ E ਦੇ ਇਸ ਅਹਿਮ ਰਾਊਂਡ 2 ਮੁਕਾਬਲੇ ਵਿੱਚ ਹਰਮਨਪ੍ਰੀਤ ਸਿੰਘ ਦੀ ਅਗਵਾਈ ਵਾਲੀ ਭਾਰਤੀ ਟੀਮ ਦਾ ਸਾਹਮਣਾ ਮਜ਼ਬੂਤ ਅਰਜਨਟੀਨਾ ਦੀ ਟੀਮ ਨਾਲ ਹੋਵੇਗਾ। Hockey India ਨੇ ਸੋਸ਼ਲ ਮੀਡੀਆ ‘ਤੇ ਭਾਰਤੀ ਪ੍ਰਸ਼ੰਸਕਾਂ ਨੂੰ ਟੀਮ ਦਾ ਹੌਸਲਾ ਵਧਾਉਣ ਦੀ ਅਪੀਲ ਕਰਦਿਆਂ ਲਿਖਿਆ ਹੈ, “Let’s get the win, boys!”।
ਭਾਰਤ ਲਈ ਜਿੱਤ ਕਿਉਂ ਹੈ ਅਹਿਮ?
ਭਾਰਤੀ ਟੀਮ ਨੂੰ ਆਪਣੇ ਪਿਛਲੇ ਦੂਜੇ ਦੌਰ ਦੇ ਮੁਕਾਬਲੇ ਵਿੱਚ ਮੇਜ਼ਬਾਨ ਨੀਦਰਲੈਂਡ ਹੱਥੋਂ 3-1 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਇਸ ਹਾਰ ਤੋਂ ਬਾਅਦ ਭਾਰਤ ਦੀਆਂ ਸੈਮੀਫ਼ਾਈਨਲ ਵਿੱਚ ਪਹੁੰਚਣ ਦੀਆਂ ਉਮੀਦਾਂ ਨੂੰ ਵੱਡਾ ਝਟਕਾ ਲੱਗਾ ਹੈ। ਹਾਲਾਂਕਿ, ਅਰਜਨਟੀਨਾ ਵੱਲੋਂ ਇੰਗਲੈਂਡ ਨੂੰ 3-1 ਨਾਲ ਹਰਾਉਣ ਤੋਂ ਬਾਅਦ ਭਾਰਤ ਦੀਆਂ ਉਮੀਦਾਂ ਅਜੇ ਵੀ ਗਣਿਤ ਦੇ ਮੁਤਾਬਕ ਜਿਉਂਦੀਆਂ ਹਨ।
ਮੈਚ ਦਾ ਸਮਾਂ ਅਤੇ ਲਾਈਵ ਪ੍ਰਸਾਰਣ
ਭਾਰਤੀ ਪ੍ਰਸ਼ੰਸਕ ਇਸ ਰੋਮਾਂਚਕ ਮੁਕਾਬਲੇ ਨੂੰ ਘਰ ਬੈਠੇ ਲਾਈਵ ਦੇਖ ਸਕਦੇ ਹਨ। ਤੁਸੀਂ ਟੀਵੀ ਅਤੇ ਡਿਜੀਟਲ ਪਲੈਟਫਾਰਮਾਂ ‘ਤੇ ਇਸ ਰੋਮਾਂਚ ਦਾ ਮਜ਼ਾ ਲੈ ਸਕਦੇ ਹੋ:
- ਮੈਚ ਦਾ ਸਮਾਂ: ਅੱਜ ਸ਼ਾਮ 6:15 ਵਜੇ (IST)
- ਟੀਵੀ ਚੈਨਲ: Star Sports Select 2 (SD+HD) ਅਤੇ DD Sports ਚੈਨਲ।
- ਡਿਜੀਟਲ / ਓਟੀਟੀ ਪਲੇਟਫਾਰਮ: JioHotstar ਐਪ ਅਤੇ ਵੈੱਬਸਾਈਟ ਦੇ ਨਾਲ-ਨਾਲ Khel ਪਲੈਟਫਾਰਮ।
-
ਸੈਮੀਫ਼ਾਈਨਲ ਦਾ ਗੁੰਝਲਦਾਰ ਗਣਿਤ
ਪੂਲ E ਦੇ ਮੌਜੂਦਾ ਸਮੀਕਰਨਾਂ ਮੁਤਾਬਕ ਭਾਰਤ ਲਈ ਅੱਗੇ ਵਧਣ ਦਾ ਰਾਹ ਕਾਫ਼ੀ ਮੁਸ਼ਕਿਲ ਅਤੇ ਗੁੰਝਲਦਾਰ ਗਣਿਤ ’ਤੇ ਟਿਕਿਆ ਹੋਇਆ ਹੈ। ਨੀਦਰਲੈਂਡ 6 ਅੰਕਾਂ ਨਾਲ ਸਿਖਰ ’ਤੇ ਹੈ, ਜਦੋਂ ਕਿ ਇੰਗਲੈਂਡ ਅਤੇ ਅਰਜਨਟੀਨਾ ਕੋਲ 3-3 ਅੰਕ ਹਨ ਅਤੇ ਭਾਰਤ -4 ਦੇ ਗੋਲ ਫ਼ਰਕ ਨਾਲ ਸਭ ਤੋਂ ਹੇਠਾਂ 0 ਅੰਕਾਂ ’ਤੇ ਹੈ। ਸੈਮੀਫ਼ਾਈਨਲ ਦੀ ਦੌੜ ਵਿੱਚ ਟਿਕੇ ਰਹਿਣ ਲਈ ਭਾਰਤ ਕੋਲ ਦੋ ਰਸਤੇ ਹਨ:
ਪਹਿਲਾ ਰਸਤਾ (3 ਗੋਲ ਦੀ ਜਿੱਤ): ਜੇਕਰ ਭਾਰਤ, ਅਰਜਨਟੀਨਾ ਨੂੰ 3 ਗੋਲਾਂ ਦੇ ਫ਼ਰਕ ਨਾਲ ਹਰਾ ਦਿੰਦਾ ਹੈ, ਤਾਂ ਭਾਰਤ ਦਾ ਗੋਲ ਫ਼ਰਕ -1 ਹੋ ਜਾਵੇਗਾ। ਅਜਿਹੀ ਸਥਿਤੀ ਵਿੱਚ, ਭਾਰਤ ਨੂੰ ਇਹ ਉਮੀਦ ਕਰਨੀ ਪਵੇਗੀ ਕਿ ਦੂਜੇ ਮੈਚ ਵਿੱਚ ਇੰਗਲੈਂਡ ਦੀ ਟੀਮ ਨੀਦਰਲੈਂਡ ਤੋਂ ਘੱਟੋ-ਘੱਟ 2 ਗੋਲਾਂ ਦੇ ਫ਼ਰਕ ਨਾਲ ਹਾਰ ਜਾਵੇ। ਇਸ ਨਾਲ ਇੰਗਲੈਂਡ ਦਾ ਗੋਲ ਫ਼ਰਕ -2 ਹੋ ਜਾਵੇਗਾ ਅਤੇ ਭਾਰਤ ਬਿਹਤਰ ਗੋਲ ਫ਼ਰਕ ਦੇ ਆਧਾਰ ’ਤੇ ਦੂਜੇ ਨੰਬਰ ’ਤੇ ਆ ਕੇ ਕੁਆਲੀਫ਼ਾਈ ਕਰ ਜਾਵੇਗਾ।
ਦੂਜਾ ਰਸਤਾ (4 ਗੋਲ ਦੀ ਵੱਡੀ ਜਿੱਤ): ਜੇਕਰ ਭਾਰਤ, ਅਰਜਨਟੀਨਾ ਖ਼ਿਲਾਫ਼ 4 ਜਾਂ ਉਸ ਤੋਂ ਵੱਧ ਗੋਲਾਂ ਦੀ ਵੱਡੀ ਜਿੱਤ ਦਰਜ ਕਰਦਾ ਹੈ, ਤਾਂ ਇੰਗਲੈਂਡ ਦੀ ਨੀਦਰਲੈਂਡ ਹੱਥੋਂ ਕਿਸੇ ਵੀ ਫ਼ਰਕ ਨਾਲ ਹੋਈ ਹਾਰ ਭਾਰਤ ਨੂੰ ਸਿੱਧਾ ਸੈਮੀਫ਼ਾਈਨਲ ਵਿੱਚ ਪਹੁੰਚਾ ਦੇਵੇਗੀ। ਹਾਲਾਂਕਿ, ਇਹ ਸਾਰਾ ਗਣਿਤ ਉਦੋਂ ਹੀ ਕੰਮ ਕਰੇਗਾ ਜੇਕਰ ਇੰਗਲੈਂਡ ਆਪਣਾ ਮੈਚ ਹਾਰੇ, ਕਿਉਂਕਿ ਜੇਕਰ ਇੰਗਲੈਂਡ ਦਾ ਮੈਚ ਡਰਾਅ ਵੀ ਹੁੰਦਾ ਹੈ, ਤਾਂ ਉਹ 4 ਅੰਕਾਂ ਨਾਲ ਭਾਰਤ ਦੀ ਪਹੁੰਚ ਤੋਂ ਬਾਹਰ ਹੋ ਜਾਵੇਗਾ।
ਭਾਰਤ ਦਾ ਹੁਣ ਤੱਕ ਦਾ ਪ੍ਰਦਰਸ਼ਨ
ਜੇਕਰ ਟੂਰਨਾਮੈਂਟ ਵਿੱਚ ਭਾਰਤੀ ਟੀਮ ਦੇ ਹੁਣ ਤੱਕ ਦੇ ਸਫ਼ਰ ’ਤੇ ਨਜ਼ਰ ਮਾਰੀਏ ਤਾਂ ਭਾਰਤ ਦਾ ਪ੍ਰਦਰਸ਼ਨ ਉਤਾਰ-ਚੜ੍ਹਾਅ ਵਾਲਾ ਰਿਹਾ ਹੈ। ਪਹਿਲੇ ਗੇੜ ਦੇ ਪੂਲ ਡੀ ਵਿੱਚ ਭਾਰਤ ਨੂੰ ਆਪਣੇ ਪਹਿਲੇ ਹੀ ਮੈਚ ਵਿੱਚ ਇੰਗਲੈਂਡ ਹੱਥੋਂ 4-2 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਹਾਲਾਂਕਿ, ਟੀਮ ਨੇ ਸ਼ਾਨਦਾਰ ਵਾਪਸੀ ਕਰਦੇ ਹੋਏ ਆਪਣੇ ਪੁਰਾਣੇ ਵਿਰੋਧੀ ਪਾਕਿਸਤਾਨ ਨੂੰ ਇੱਕ ਰੋਮਾਂਚਕ ਮੁਕਾਬਲੇ ਵਿੱਚ 5-3 ਨਾਲ ਸ਼ਿਕਸਤ ਦਿੱਤੀ। ਇਸ ਜਿੱਤ ਬਦੌਲਤ ਭਾਰਤੀ ਟੀਮ ਨੇ ਰਾਊਂਡ 2 ਦੇ ਪੂਲ ਈ ਵਿੱਚ ਥਾਂ ਬਣਾਈ। ਪਰ ਦੂਜੇ ਦੌਰ ਦੇ ਪਹਿਲੇ ਮੈਚ ਵਿੱਚ ਸਹਿ-ਮੇਜ਼ਬਾਨ ਨੀਦਰਲੈਂਡ ਨੇ ਭਾਰਤ ਨੂੰ 3-1 ਨਾਲ ਹਰਾ ਕੇ ਉਸ ਦੀਆਂ ਮੁਸ਼ਕਿਲਾਂ ਵਧਾ ਦਿੱਤੀਆਂ। ਕਪਤਾਨ ਹਰਮਨਪ੍ਰੀਤ ਸਿੰਘ ਹੁਣ ਤੱਕ 6 ਗੋਲ ਕਰਕੇ ਟੂਰਨਾਮੈਂਟ ਦੇ ਟਾਪ-ਸਕੋਰਰ ਬਣੇ ਹੋਏ ਹਨ, ਪਰ ਭਾਰਤੀ ਫਾਰਵਰਡ ਲਾਈਨ ਦੀ ਫੀਲਡ ਗੋਲ ਕਰਨ ਵਿੱਚ ਨਾਕਾਮਯਾਬੀ ਟੀਮ ਲਈ ਚਿੰਤਾ ਦਾ ਵਿਸ਼ਾ ਰਹੀ ਹੈ। ਹੁਣ ਭਾਰਤ ਨੂੰ ਸੈਮੀਫ਼ਾਈਨਲ ਦੀ ਦੌੜ ਵਿੱਚ ਬਣੇ ਰਹਿਣ ਲਈ ਅਰਜਨਟੀਨਾ ਖ਼ਿਲਾਫ਼ ਹਰ ਹਾਲ ਵਿੱਚ ਵੱਡੀ ਜਿੱਤ ਦਰਜ ਕਰਨੀ ਪਵੇਗੀ।
ਭਾਰਤੀ ਮਹਿਲਾ ਹਾਕੀ ਟੀਮ ਹੋਈ ਬਾਹਰ
FIH ਮਹਿਲਾ ਹਾਕੀ ਵਿਸ਼ਵ ਕੱਪ 2026 ਵਿੱਚ ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ, ਪਰ ਉਹ ਬੇਹੱਦ ਮੰਦਭਾਗੇ ਤਰੀਕੇ ਨਾਲ ਸੈਮੀਫ਼ਾਈਨਲ ਦੀ ਦੌੜ ਵਿੱਚੋਂ ਬਾਹਰ ਹੋ ਗਈ ਹੈ। ਐਤਵਾਰ ਨੂੰ ਖੇਡੇ ਗਏ ਇੱਕ ਬੇਹੱਦ ਰੋਮਾਂਚਕ ਅਤੇ ਸਖ਼ਤ ਮੁਕਾਬਲੇ ਵਿੱਚ ਭਾਰਤੀ ਮਹਿਲਾ ਟੀਮ ਨੇ ਮਜ਼ਬੂਤ ਆਸਟ੍ਰੇਲੀਆਈ ਟੀਮ ਨੂੰ 0–0 ਦੀ ਬਰਾਬਰੀ ’ਤੇ ਰੋਕ ਦਿੱਤਾ। Hockey India ਨੇ ਸੋਸ਼ਲ ਮੀਡੀਆ ਅਕਾਊਂਟ ਐਕਸ ‘ਤੇ ਲਿਖਿਆ, “ਭਾਰਤੀ ‘ਸ਼ੇਰਨੀਆਂ’ ਨੇ ਮੈਦਾਨ ’ਤੇ ਆਪਣੀ ਪੂਰੀ ਜਾਨ ਲਾਉਂਦਿਆਂ ਆਸਟ੍ਰੇਲੀਆ ਨੂੰ ਕੋਈ ਗੋਲ ਨਹੀਂ ਕਰਨ ਦਿੱਤਾ, ਪਰ ਇਸ ਡਰਾਅ ਮੈਚ ਦੇ ਬਾਵਜੂਦ ਅੰਕਾਂ ਦੇ ਗਣਿਤ ਕਾਰਨ ਭਾਰਤੀ ਟੀਮ ਸੈਮੀਫ਼ਾਈਨਲ ਬ੍ਰੈਕਟ ਵਿੱਚ ਜਗ੍ਹਾ ਬਣਾਉਣ ਤੋਂ ਖੁੰਝ ਗਈ ਅਤੇ ਟੂਰਨਾਮੈਂਟ ਤੋਂ ਬਾਹਰ ਹੋ ਗਈ।”
